نشاط ثقافى جديد ومتميز ظهر فى الآونة الأخيرة فى بلدنا العمار ، وكان له سبب واحد هو تواجد شباب العمارممثلين فى منتدى شباب العمار فى أرض الواقع ومنتدى شباب العمار عو ملتقى شبابى على شبكة الأنترنت يضم نحو 3000 شاب عمارى يتناقشون حول كل مايهم العمار ويناقشون كل ماهو عامرى فى الماضى والحاضر وبالطبع فى المستقبل ،الجديد الذى يعد له شباب المنتدى هو مهرجان ( عمار يابلدى ) وهو مهرجان ثقافى كبير من المقرر إقامته فى أول أيام عيد الأضحى المبارك بمركز شباب العمار التقينا بمجموعة منهم وسألناهم عن المهرجان وعن المنتدى وعن العديد من المواضيع الهامة للعمار فماذا قالوا :
الموقع / نرحب بكم فى موقع الأستاذ صبرى طه
أحمد السيد / متشكرين جدا على الدعوة وعلى الحوار
باهر حكام / فرصة سعيدة جدا اننا معاكم وجاهزين لأى أسئلة .
أحمد زغلول / متشكرين على الاستضافة .
الموقع / أولا عاوزين نعرف ايه الجديد فى منتدى شباب العمار
باهر
والله أولا انا بشكر ربنا ان المنتدى بقى له دور ودور كبير فى العمار وتأثيره ولله الحمد بيزيد يوم عن التانى وده يمكن لان ربنا وحده اللى يعلم اننا بنعمل اى عمل ونسأل الله الاخلاص فيه وربنا يجازينا خير ويرزقنا الاخلاص فى القول والعمل اه ويمكن العمل بتاع المنتدى قائم عليه فريق كبير جدا احنا جزء بسيط اوى منه واما عن الجديد أسيب بقى أحمد السيد واحمد زغلول يتكلموا عنه
أحمد السيد
والله احنا الان بصدد اقامة ثلاث مشاريع ومن وجهه نظرى الثلاثة فى غايه الأهميه
الأول : هو ورشة العمل الخاصة بتجهيز المعرض الخيرى الثانى للملابس واللى احنا ناويين ان شاء الله نفتتحه قبل عيد الأضحى بأسبوع وهيكون بمناسبة العيد وكمان موسم الشتاء ان شاء الله والمعرض المرة دى هيكون جديد جدا واحنا مصرين ان يكون كل الملابس ان شاء الله جديدة علشان نحقق أكبر استفادة لأيتام وفقراء العمار المستفيدين من المعرض
الثانى : حملة عملناها من أيام بس وهى بخصوص تصحيح الجداول الانتخابية وكمان اضافة اى اسماء جديدة ليها وطبعا ده هيتم عن طريق تجميع صور البطاقات الشخصية للشباب والبنات فى العمار وتسجيلها ان شاءالله فى مركز طوخ بحيث يكون معانا ان شاء الله بطاقة انتخابية لكل شاب من العمار استعدادا لانتخابات مجلس الشعب 2010 وكمان الانتخابات الرئاسية 2011 ان شاء الله
أما بقى موضوع المهرجان فهسيب أحمد زغلول يتكلم عنه
أحمد زغلول
والله انا بحمد ربنا على أى نجاح احنا حققنا وبسأل ربنا انه يوفقنا فى أى عمل قادم ان شاء الله أما بخصوص المهرجان فهو كان بفكرة من مجموعة طيبة من مثقفى العمار خصوصا بعد نجاح الندوة الشعرية اللى أقمناها فى مركز الشباب من حوالى شهر والحمد لله التفكير كان ازاى نستغل نجاح الندوة ونقدر نعمل اى عمل كبير نوحد فيه الشباب فى العمار ونخليهم تحت مظلة قوية ومتميزة وهى مظلة الثقافة
الموقع / طيب ياريت نعرف تفاصيل أكتر عن المهرجان
أحمد السيد
والله هى الفكرة كانت من الأستاذ السيد الشاذلى اللى عرض الموضوع علينا وانا عرضته على مجلس المنتدى والحمد لله خد موافقة وتم تكليفى انا والبشمهندس باهر والاستاذ احمد زغلول بالموضوع من فريق المنتدى للتعاون من اللجنة المنظمة واللى بتتكون معانا من الاستاذ السيد الشاذلى والأستاذ محمود عبد الفتاح والحمد لله احنا فى تفاهم كبير اوى بنا احنا التلاته وبين الاساتذه وربنا يوفق ان شاء الله اما بخصوص تفاصيل المهرجان ان شاء الله هيكون أول ايام عيد الأضحى وهيكون فى مركز الشباب وهيكون ان شاء الله أمسية ممتازة لكل العمار وهيكون ان شاء الله بدعم من شباب العمار وده لاننا للاسف لم نجد اى دعم من المركز نظرا لان الميزانيه لاتسمح ولكن الحمد لله قدرنا نتغلب على المشكلة دى بالدعم الخاص من اتنين من مثقفى العمار وربنا يبارك فيهما ان شاء الله وبعدين فكرنا فى موضوع الاعلان مقابل الرعاية للمهرجان واللى الحمد لله فاز بحق الرعاية الرسمية للمهرجان الاستاذ صبرى طه ونتمنى ان شاء الله انه يكون مهرجان ناجح وربنا ييسرالحال
الموقع / طيب لو اتكلمنا عن الضيوف اللى هيتم دعوتها او البرنامج يعنى بشكل عام للمهرجان
باهر
والله بخصوص موضوع الضيوف ان شاء الله سيتم دعوة السيد الاستاذ الدكتور محمد نصر الدين علام وزير الموارد المائية والرى وكمان السيد الوزير المحافظ محافظ القليوبية والسيد أمين الحزب الوطنى بالمحافظة وكمان السيد رئيس مجلس ومدينة طوخ ده بالاضافه لعدد كبير جدا من كبار رجال العمار ومثقافيها على رأسهم طبعا السيد العميد محى عبد العاطى عضو مجلس الشعب
أحمدزغلول
بخصوص برنامج المهرجان لسه والله لم نستقر بشكل تام عليه ولكن تقريبا هيكون فى طبعا تكريم للفائزين فى مسابقة العمار للإلقاء الشعرى وهى مسابقة تحت رعاية مهندسا الشعراء العماريين البشمهندس أحمد عبد العزيزعبده والبشمهندس أحمد فتحى الهيو ربنا يبارك فيهم وهيكون فى ان شاء الله فيلم وثائقى عن العمار وكمان مجموعة من الفقرات اللى نتمنى ان شاء الله انها تنال رضاكم
الموقع / كلمة أخيرة للموقع تقولوا ايه
أحمد السيد
نقول نتمنى ان يكون دعمكم لنا مستمر من اجل تحقيق تنمية فى شتى مجالات الحياة داخل العمار ونعدكم بكل جديد ومميز لهذه البلد التى يجرى حبها فى دمائنا ولكم منا كل الشكر على الدعم والرعايه للمهرجان .ومتشكرين على اللقاء
